កាលពីពេលថ្មីៗនេះ លោកគ្រូចិនសែម៉ុង និង តារាសម្តែងលោក តុប វិសាល ដែលគេស្គាល់ក្នុងរឿងគាស់ផ្នូរថាជា លោកគ្រូចិនសែ រួមទាំងតួសម្តែងផ្សេងទៀតក្នុងរឿងគាស់ផ្នូរ បានទៅជួបអ្នកគាំទ្រនៅតាមរោងភាពយន្តនានា ក្នុងប្រទេសកម្ពុជា។ សកម្មភាពនេះ ធ្វើឡើងស្របពេលដែលខ្សែភាពយន្តខ្នាតធំ រឿងគាស់ផ្នូរ របស់ផលិតកម្មសាស្រ្តា ហ្វៀម បានផ្ទុះការគាំទ្រយ៉ាងខ្លាំង ខណៈទទួលបានមតិសរសើរពីមហាជនថាជាភាពយន្តដែលផលិតបានយ៉ាងល្អ ទាំងសាច់រឿង និង គុណភាពនៃការថត។
លោគ្រូចិនសែ ម៉ុង ជាមនុស្សម្នាក់ដែលបានចូលរួមចំណែកក្នុងការផលិតរឿង គាស់ផ្នូរ នេះឡើងដោយសាច់រឿងផ្អែកលើរឿងរ៉ាវពិតដែលលោកធ្លាប់បានជួប។ ជាក់ស្តែង លោកបាននិយាយអំពីហេតុការណ៍នេះ នៅលើកម្មវិធីមួយមុនពេលយកមកផលិតចេញជារឿងកុនខ្នាតធំ។ លោកគ្រូចិនសែ ម៉ុង សម្តែងនូវសេចក្តីរំភើបនៅពេលដែលរឿង គាស់ផ្នូរ ចាក់បញ្ចាំង ទទួលបានការគាំទ្រយ៉ាងច្រើនមិននឹកស្មានដល់។ លោក បានបន្ថែមថា ភាពយន្តនេះ ក្រៅពីផ្តល់នូវការកម្សាន្ត ក៏មានបង្កប់នូវអត្ថន័យអប់រំក្នុងជីវិតពិតទៅដល់អ្នកទស្សនា។
រោងភាពយន្តដែលលោកគ្រូចិនសែ ម៉ុង និង តារាសម្តែងក្នុងរឿងគាស់ផ្នូរបានទៅជួបអ្នកគាំទ្រមានដូចជា Major Cineplex, Legend Cinemas និង Prime Cineplex ជាដើម។ ក្នុងនោះក្រុមការងារក៏បានទៅជួបអ្នកគាំទ្រនៅខេត្តព្រះសីហនុ ផងដែរ គឺនៅរោងភាពយន្ត Legend Cinema Sihanoukville។ ទន្ទឹមនឹងនេះ កំណត់ត្រាមួយបានឆ្លុះបញ្ចាំងឱ្យឃើញពីភាពជោគជ័យនៃរឿង គាស់ផ្នូរ គឺការជាប់ជាខ្សែភាពយន្តដែលបានលក់សំបុត្រដាច់បំផុត គ្រប់រោងភាពយន្ត Legend Cinemas ត្រឹមមួយសប្តាហ៍ដំបូងនៃការចាក់បញ្ចាំងជាផ្លូវការ៕
សកម្មភាពតួសម្តែងរឿង គាស់ផ្នូរ ទៅជួបអ្នកគាំទ្រ នៅតាមរោងភាពយន្តនានាក្នុងប្រទេសកម្ពុជា ៖
