ខ្សែភាពយន្តរឿង គាស់ផ្នូរ កំពុងផ្ទុះការគាំទ្រពីទស្សនិកជន រហូតជាប់លេខ 1 ជារឿងដែលលក់សំបុត្រដាច់បំផុតប្រចាំរោងភាពយន្ត Legend។ នេះជាសមិទ្ធផលដែលផលិតកម្ម សាស្រ្តា ហ្វៀម សម្រេចបានថ្មីមួយទៀតនៅក្នុងឆ្នាំ 2024 នេះ។ ភាពយន្តរន្ធត់ខ្នាតធំនេះ ចាក់បញ្ចាំងបានជាងមួយសប្តាហ៍ហើយ ក្រោយពីបានធ្វើពិធីសម្ពោធជាផ្លូវការ កាលពីថ្ងៃទី 28 ខែ តុលា ឆ្នាំ 2024 កន្លងទៅ នៅផ្សារទំនើប Chip Mong 271 Mega Mall ក្រោមវត្តមានភ្ញៀវកិត្តិយសចូលរួមជាច្រើនរូប។
ជាប់ចំណាត់ថ្នាក់លេខ 1 ជាខ្សែភាពយន្តដែលលក់សំបុត្របានច្រើនបំផុតប្រចាំរោងភាពយន្ត Legend <<គាស់ផ្នូរ>> បានទាក់ទាញចំណាប់អារម្មណ៍ពីមហាជនដែលបានទៅទស្សនាផ្ទាល់ ធ្វើឱ្យប្រិយមិត្តសរសើរមិនដាច់ពីមាត់ថា ជាភាពយន្តដែលផលិតបានល្អ រាប់បញ្ចូលទាំងគុណភាព គុណតម្លៃ បូករួម អត្ថន័យ និង អត្ថរស់ នៃសាច់រឿងទាំងមូលជាដើម។ ជាខ្សែភាពយន្តដែលបានផលិតឡើងផ្អែកលើសាច់រឿងពិតនៃគ្រូចិនសែ ម៉ុង ដំណាក់កាលនៃការផលិត ក្រុមការងារពិតជាប្រុងប្រយ័ត្ន និង បានសម្រិតសម្រាំង ធ្វើយ៉ាងណាឱ្យរឿងមួយនេះចេញមកបានល្អ។
ជាមួយគ្នានេះ តួអង្គសំខាន់ៗ នៅក្នុងរឿងគាស់ផ្នូរ មានដូចជា តួលោកគ្រូចិនសែ សម្តែងដោយ តុប វិសាល, តួអង្គម្តាយ សម្តែងដោយ កែវ ស៊ីណាក់ និង តួអង្គកូនប្រុសពៅ សម្តែងដោយ វាសនា ធិណារាជ រួមទាំងតារាកិត្តិយសជាច្រើនរូបទៀត។ ភាពយន្តដែលកំពុងផ្ទុះការគាំទ្រគួរឱ្យកត់សម្គាល់នេះ ត្រូវបានដឹកនាំសម្តែងដោយ លោក គូ ដារ៉ាចាន់ និង និពន្ធសាច់រឿងដោយលោក ងឿយ ប៊ុនរ័ត្ន៕
